आज नेपाल र उज्वेकिस्तान भिड्दै

काठमाडौ, भाद्र २२ - आठ वर्षपछि महादेशीय प्रतियोगिताको फाइनल चरणमा फर्केको नेपालले डिफेन्डिङ च्याम्पियन उज्वेकिस्तानविरुद्धको खेलसँगै आइतबार एएफसी यू-१६ च्याम्पियनसिपको यात्रा सुरु गर्दैछ।

छनोटमा दुई पहेंलो कार्ड बेहोरेका कप्तान विमल घर्तीमगरबिना नेपाली टिम बैंककस्थित मुआङथोङ स्टेडियममा खेल्नेछ। उनको अनुपस्थितिमा अञ्जन विष्ट र सुनील बलले अग्रपंक्ति सम्हाल्न सक्नेछन्। 'आर्मब्यान्ड' डिफेन्डर अनन्त तामाङले लगाउने मुख्य प्रशिक्षक बालगोपाल महर्जनले बताए।

'मुख्य खेलाडी विमल नहुँदा टिममा पक्कै फरक पर्छ,' प्रशिक्षक महर्जनले भने, 'उज्वेकिस्तान हामीभन्दा बलियो टिम हो। त्यसैले बराबरी नतिजा निकाल्ने योजनासहित खेल्नेछौं।' त्यसपछि उत्तर कोरिया र कुवेतलाई पराजित गर्दै समूह 'सी'को शीर्ष दुईमा रहँदै नकआउट चरण पुग्ने उनले योजना बनाएका छन्।

एएफसी -एसियाली फुटबल महासंघ) का ४६ मध्ये उत्कृष्ट १६ टिम सहभागी प्रतियोगिता शनिबारै सुरु भएको छ। पहिलो दिन दक्षिण कोरियाले ओमानलाई ३-१ र जापानले हङकङलाई २-० ले पराजित गरे।

अभ्यासमा नेपाल यू-१६

गोल    प्रतिद्वन्द्वी

३-३    थाइल्यान्ड यू-१६

०-२    मनाङ-मस्र्याङ्दी

०-५    एन्डरलेच्त यू-१९

३-२    वार्ट लिउ यू-१७

०-०    दक्षिण कोरिया यू-१७

२-२    बोइन युनिभर्सिटी यू-१७

१-०    लिउङगोग यू-१७