|
|
|
बर्दिया, चैत ३ – प्रहरीले हत्यारा फेला पार्नेलाई पुरस्कारको घोषणा गरेको छ । हत्या अभियोगमा हिरासतमै भएका कैदी फरार भएपछि प्रहरीले फेला पार्ने वा सूचना दिने व्यक्तिलाई पुरस्कारको घोषणा गरेको हो ।हत्या अभियोगमा पक्राउ परेका बर्दिया ठाकुरद्धारा–४ सुतैयाका २३ वर्षका टोपे भनिने अजिव वुढा क्षेत्री अदालतको शौचालयबाट भागेको ४ दिन हुँदा समेत प्रहरीले फेला पार्न सकेको छैन ।
कर्तव्य ज्यान मुद्दाका प्रतिवादी अजिव बुढा क्षेत्रीलाई फेला पार्नुहुने वा सहि सूचना दिनेलाई उचित पुरस्कारको घोषणा गर्दै जिल्ला प्रहरी कार्यालय बर्दियाले चोकचौकमा फोटोसहित सूचना टाँस गरेको छ ।
गहुँगोरो, ५ फिट ४ इन्च उचाई, बाँया हातको बिचको औँलाको नङ्ग फुटेको, ४ वटा वटन भएको टिसर्ट र आर्मी कम्ब्याट जस्तो पाइन्ट लगाएको फरार अभियुक्तलाई कहीँ कतै देखेमा प्रहरीमा खबर गरीदिन जिल्ला प्रहरी कार्यालय बर्दियाले अनुरोध गर्दै पुरस्कारको घोषणा गरेको हो ।
चैत १ गते बिहान ठाकुरद्धारा सुतैयाका वासिन्दाले हत्याका अभियुक्तलाई पक्राउ गर्नुपर्ने, सुतैया गाउँवासीलाई सुरक्षा दिनुपर्ने भन्दै नारा जुलुससहित ठाकुरद्धारा प्रहरी चौकी घेराउ गरी ज्ञापनपत्र बुझाएपछी रातदिन ठाकुरद्धारा गाविसमा व्यापक प्रहरी तैनाथ गरीएको छ । ‘अभियुक्तलाई दिनरात खोजी गरीरहेका छौँ, गाउँमै देखा परेको सूचनाका आधारमा बर्दिया प्रहरी प्रमुख एसपी भोजजंग शाहको टोलीसहित सुतैया गाउँमा परिचालित छ’ डिएसपी नेत्रमणि गिरीले भन्नुभयो ।
बर्दिया ठाकुरद्धारा-४ सुतैयाका ६९ वर्षका जोरे थापाको गएको फागुन ५ गते धारीलो हतियार प्रहार गरी हत्या गरेको अभियोगमा पक्राउ परेका ठाकुरद्धारा–४ सुतैयाका टोपे भनिने अजिव बुढा जिल्ला अदालतको शौचालयबाट गएको फागुन ३० गते दिउँसो फरार भएका थिए । बर्दिया जिल्ला अदालतमा थुनछेक आदेश बहस चल्दै गर्दा उनी शौचालयको भेन्टीलेसनबाट भागेको प्रहरीले जनाएको छ । फरार भएको ३० गते रातिदेखि सुतैया गाउँवासी त्रसित छन् । गाउँमा सुरक्षा व्यवस्था बढाइएको छ ।
प्रहरी प्रशासनको लापरवाहीका कारण हत्याका अभियुक्त अदालतबाटै फरार भएको भन्दै स्थानिय बासिन्दाले अभियुक्तलाई तुरुन्त पक्राउ गर्न र गाउँमा सुरक्षा दिन माग गरेका छन् ।
0 comments:
Post a Comment